ព័ត៌មានក្នុងខេត្ត

នាព្រឹកថ្ងៃទី១១ ខែសីហា ឆ្នាំ២០២៦ ឯកឧត្ដមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមបណ្ដាញកសិករតេជោ បានដឹកនាំប្រតិភូអញ្ជើញជាអធិបតីក្នុងពិធីជួបសំណេះសំណាល និងសួរសុខទុក្ខជាមួយប្រជាកសិករមកពីស្រុកជាំក្សាន្ដចំនួន ១៥០ គ្រួសារ ដើម្បីស្វែងយល់ពីតម្រូវការជាក់ស្តែង និងជំរុញការលើកកម្ពស់ជីវភាពរស់នៅឱ្យកាន់តែប្រសើរឡើង ដែលបច្ចុប្បន្នកំពុងស្នាក់នៅបណ្ដោះអាសន្ន ក្នុងភូមិតាកឹងបៃតង ឃុំថ្នល់បែក ស្រុកគូលែន ខេត្តព្រះវិហារ។

ដើម្បីទ្រទ្រង់ និងលើកស្ទួយវិស័យព្រះពុទ្ធសាសនាដែលជាសាសនារបស់រដ្ឋឱ្យកាន់តែចម្រើនរុងរឿង នាព្រឹកថ្ងៃទី១០ ខែសីហា ឆ្នាំ២០២៦ នេះ ថ្នាក់ដឹកនាំខេត្តព្រះវិហារ បានអញ្ជើញនាំយកបច្ច័យ ទៀនព្រះវស្សា និងទេយ្យទានផ្សេងៗ ទៅវេរប្រគេនជូនព្រះសង្ឃដែលគង់ចាំព្រះវស្សាអស់ត្រីមាស ក្នុងស្រុកត្បែងមានជ័យ ប្រកបដោយសទ្ធាជ្រះថ្លា ក្នុងនោះទី១.គឺវត្តទួលឧត្តម (ហៅវត្តប្រមេរុ) ស្ថិតនៅភូមិប្រមេរុ ឃុំប្រមេរុ ស្រុកត្បែងមានជ័យ ដឹកនាំដោយ លោក គឹម ចាន់បញ្ញា អភិបាលរងខេត្តព្រះវិហារ និងទី២. វត្តពោធិ៍កែវមានជ័យ ស្ថិតនៅភូមិពោធិ៍ ឃុំពោធិ៍ ស្រុកត្បែងមានជ័យ ដឹកនាំដោយ លោក វ៉ាត់ ប៉ារ៉ានីន និង លោក ហុក សុផល អភិបាលរងខេត្តព្រះវិហារ។

បើយោងតាម ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានជម្រាបលោក Alain Aeschlimann ទីប្រឹក្សាផ្នែកសុវត្ថិភាព និងការគ្រប់គ្រងវិបត្តិនៃទីស្នាក់ការកណ្តាល ICRC ថា លទ្ធផលស្រាវជ្រាវដែលទើបបញ្ចប់នៅភូមិចំនួន ៣៣៥ បានបង្ហាញពីទំហំដ៏ធ្ងន់ធ្ងរនៃការបំពុលដោយសំណល់យុទ្ធភណ្ឌរបស់យោធាថៃ។ តំបន់រងផលប៉ះពាល់ចំនួន ៥,៣៤៨ ពហុកោណ ត្រូវបានកំណត់លើផ្ទៃដីសរុប ៣,៨៧២ គីឡូម៉ែត្រការ៉េ ក្នុងនោះតំបន់រងផលប៉ះពាល់ដោយគ្រាប់បែកចង្កោមមានរហូតដល់ ៣,៨៥៨ ពហុកោណ គ្របដណ្តប់ផ្ទៃដីជិត ២,៧០០ គីឡូម៉ែត្រការ៉េ។ តួលេខទាំងនេះមិនមែនគ្រាន់តែជាស្ថិតិទេ ប៉ុន្តែជាការឆ្លុះបញ្ចាំងពីទំហំគ្រោះថ្នាក់ដែលប្រជាពលរដ្ឋកម្ពុជាត្រូវរស់នៅជាមួយជារៀងរាល់ថ្ងៃ។

សង្គ្រាមឈ្លានពានរបស់យោធាថៃមកលើអធិបតេយ្យ និងបូរណភាពទឹកដីកម្ពុជាចំនួនពីរលើកក្នុងឆ្នាំ២០២៥ បានបង្កឱ្យមានវិបត្តិមនុស្សធម៌ដ៏ធ្ងន់ធ្ងរ ដោយមានប្រជាពលរដ្ឋកម្ពុជាប្រមាណ ៦៥០ ០០០ នាក់ ត្រូវបង្ខំចិត្តចាកចេញពីផ្ទះសម្បែង និងភូមិដ្ឋានរបស់ខ្លួន ដើម្បីគេចចេញពីគ្រោះថ្នាក់នៃសង្គ្រាម។

កាលពីថ្ងៃទី០៧ ខែសីហា ឆ្នាំ២០២៦ ម្សិលមិញនេះ រដ្ឋបាលខេត្តព្រះវិហារ សហការជាមួយអាជ្ញាធរស្រុកជាំក្សាន្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានរៀបចំពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិដីធ្លី) សរុបចំនួន ១,៥៤៤ ក្បាលដី ជូនដល់បងប្អូនប្រជាពលរដ្ឋចំនួន ៩៣៦ គ្រួសារ រស់នៅក្នុងស្រុកជាំក្សាន្ត ខេត្តព្រះវិហារ។

ខេត្តព្រះវិហារ បោះជំហានឈានមុខគេ ខាងផលិតស្រូវសរីរាង្គតាមរយៈកិច្ចសន្យា ត្រៀមចាក់បញ្ចូលថវិកា ១២លានដុល្លារ ចូលចរន្តសេដ្ឋកិច្ចគ្រួសារកសិករ!

ដើម្បីទ្រទ្រង់ និងលើកស្ទួយវិស័យព្រះពុទ្ធសាសនាដែលជាសាសនារបស់រដ្ឋឱ្យកាន់តែចម្រើនរុងរឿង នាព្រឹកថ្ងៃទី០៧ ខែសីហា ឆ្នាំ២០២៦នេះ វត្តពោធិ៍ប្រាំពាន់ដើម ស្ថិតក្នុងឃុំគូលែនត្បូង ស្រុកគូលែន ខេត្តព្រះវិហារ បានប្រារព្ធពិធីប្រគេនទៀនព្រះវស្សា និងនាំយកបច្ច័យ ព្រមទាំងប្រេងកាត និងទេយ្យទានផ្សេងៗ ទៅវេរប្រគេនជូនព្រះសង្ឃដែលគង់ចាំព្រះវស្សាអស់ត្រីមាសប្រកបដោយសទ្ធាជ្រះថ្លា។

ក្រសួងការពារជាតិ ៖ ក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួលជូនក្រុមអ្នកសង្កេតការណ៍អាស៊ានប្រចាំព្រះរាជាណាចក្រកម្ពុជា (ASEAN Observer Team - Cambodia: AOT-KH) ដើម្បីចុះសង្កេតការណ៍ ផ្ទៀងផ្ទាត់ និងរាយការណ៍ នៅចំណុចភូមិស្រអែមខាងជើង ឃុំស្រអែម ស្រុកជាំក្សាន្ត ខេត្តព្រះវិហារ ដែលជាភូមិដ្ឋានរស់នៅរបស់ប្រជាជនស៊ីវិលស្លូតត្រង់។

ស្មារតីនឹកលឹក និងការយកចិត្តទុកដាក់ពីសមរភូមិក្រោយ តែងតែជាកម្លាំងចិត្តដ៏ធំធេងសម្រាប់វីរកងទ័ពដែលកំពុងឈរជើងការពារបូរណភាពទឹកដីនៅសមរភូមិមុខ។ ជាក់ស្តែង ក្នុងឱកាសនាំយកស្បៀងអាហារស្រស់ និងភេសជ្ជៈ ដែលជាអំណោយដ៏ថ្លៃថ្លារបស់ លោកជំទាវ សុខា គងពិសី គីម រិទ្ធី តាមរយៈមន្ទីរព័ត៌មានខេត្តព្រះវិហារ ទៅប្រគល់ជូនកងទ័ពសមរភូមិមុខ ចំនួន ២ អង្គភាព ចំណុះឱ្យកងពលតូចអន្តរាគមន៍លេខ៨ នាទិសទី១ ប្រាសាទព្រះវិហារ គណៈប្រតិភូដឹកនាំដោយលោកជំទាវ ខូយ ប៊ុនថាន សមាជិកក្រុមប្រឹក្សាខេត្ត បានពាំនាំនូវមនោសញ្ចេតនា និងសារប្តេជ្ញាចិត្តយ៉ាងមានអត្ថន័យ។

រដ្ឋបាលខេត្តព្រះវិហារ​ បានរៀបចំកិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅបន្ត របស់លេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀន និងកម្មវិធីរៀបចំទិវាប្រយុទ្ធប្រឆាំង គ្រឿងញៀន សម្រាប់ឆ្នាំ២០២៦ ក្រោមអធិបតីភាព លោក វ៉ាត ប៉ារ៉ានីន អភិបាលរងខេត្ត។ កិច្ចប្រជុំនេះធ្វេីឡើងនាព្រឹកថ្ងៃទី០៦ សីហា ឆ្នាំ២០២៦ នៅសាលប្រជុំព្រះខ័នអគាររដ្ឋបាលសាលាខេត្តព្រះវិហារ​ ដោយមានការអញ្ជើញចូលរួមពីសំណាក់ លោក លោកស្រីប្រធាន-អនុប្រធានមន្ទីរ អង្គភាព-ជុំវិញខេត្ត​ កងកម្លាំងទាំង៣ និងអ្នកពាក់ព័ន្ធជាច្រេីនរូបទៀត

កាលពីរសៀលថ្ងៃទី០៣ ខែសីហា ឆ្នាំ២០២៦ លោក មិន សុីថា អភិបាលរងខេត្ត តំណាងដ៏ខ្ពង់ខ្ពស់ឯកឧត្តម គីម រិទ្ធីអភិបាលខេត្តព្រះវិហារ បានអញ្ជើញជាអធិបតីក្នុងកិច្ចប្រជុំដោះស្រាយវិវាទដីធ្លី ដែលស្ថិតនៅភូមិថ្មី សង្កាត់កំពង់ប្រណាក ក្រុងព្រះវិហារ ខេត្តព្រះវិហារ រវាងលោក អ៊ាត សៀងលី និងភាគីពាក់ព័ន្ធ លើករណីដីចំណីមាត់ស្ទឹង ដោយមានការចូលរួមពីអាជ្ញាធរមូលដ្ឋាន និងមន្ទីរជំនាញពាក់ព័ន្ធ នៅសាលប្រជុំប្រាសាទកោះកេរ ជាន់ទី៣ រដ្ឋបាលខេត្តព្រះវិហារ។

ការចុះផ្ទាល់ជាលើកទី២ របស់ឯកអគ្គរដ្ឋទូតចិន បន្ទាប់ពីការផ្តល់ជំនួយឧបត្ថម្ភថវិកា ១០ម៉ឺនដុល្លារ កាលពីខែកញ្ញា ឆ្នាំ២០២៥ គឺជាការស្តែងចេញយ៉ាងប្រាកដនិយមពីមនោសញ្ចេតនា «រួមសុខទុក្ខជាមួយគ្នា» ក្នុងស្មារតីមិត្តភាពដែកថែប។